Nasihat karne wale ko nasihat

بِسْمِ اللهِ الرَّحْمٰنِ الرَّحِيْمِ

Nasihat karne wale ko nasihat

Aaqa Noor apni kitab darussalm jild1 pg no 247 par buzurg aalim wa zahid sayyed Hashim Bahrani ke hawale se likhte hain,

Najaf e ashraf me ek itr farosh raha karta tha. Wo rozana namaz e zohar ke bad apni dukan par waaz o nasihat kiya karta tha. Uski dukan par hamesha logo ki bheed lagi rehti thi. Najaf me muqeem ek Hindustani shahzade ko jab safar darpesh aya to usne intehayi qeemti qism ke heere jawahrat apne sandook me bhare aur nasihat karne wale usi itr farosh ke pas ba'taur e amanat rakh kar rawana ho gaya.

Kuch arse bad jab wo safar se palat kar aaya aur apni amanat talab ki to itr farosh ne saaf inkar kaar diya!

Ye sun kar wo hindustani shahzada hairan o pareshan ho gaya. Aur bil'akhir Hazrat Ali as ke rauza e aqdas par ja kar dua ki aur yun goya hua,

"Ya Ali as maine  aapke pas rehne ki khatir apna watan aur tamam zahiri aish o aaram chhoda hai. Mere pas jo kuchh bhi tha use maine falan itr farosh ke pas rakhwa diya. 

Uske alawa ab mere pas kuchh nahi hai.magar wo sire se inkar kar raha hai. Apna haq sabit karne ke liye mere pas koi gawah bhi nahi hai. Aapke alawa koi meri fariyad sunne wala nahi hai."

Hazrat Ameerul Momineen as ke rauze par fariyad karne ke bad ye shahzada jab raat ko soya to isne khwab me dekha ki hazrat Ali as farma rahe hain,

"Kal subah jab shaher ka darwaza khule to tum bahar nikal jana aur jo shakhs sabse pehle tumhe nazar aye usse apni amanat talab karna wo tumhe tumhari amanat de dega."

Wo shahzada so kar utha aur najaf se bahar nikla.Sabse pehle shakhs par jab uski nazar padi to wo ek zaeef ul umr , aabid o zahid shakhs tha. Jo kandho par lakdiyo ka bojh laadehue jaa raha tha. Uski surat e haal se saaf zahir tha ki wo in lakdiyo ko bech kar hi apne ahl o ayal ke akhrajat pure karta hai. Uski halat dekh kar shahzade ko usse amanat talab karne me sharm mehsoos hui. Wo dobara palat kar rauza e Ali as pa aya aur jab dusri raat soya to fir khwab dekha ki Hazrat Ali as usse keh rahe hain,

"Tumne kal us shakhs ko dekha tha lekin kuchh nahi kaha!"

Fir teesri raat bhi us shahzade ne pichhli do raato ki tarah hi khwab dekha. hazrat ali as ne wahi hidayat farmai. Teesre din jab shahzade ne us zaeef ul umr momin ko dekha to usse apne halaat bayan kiye aur amanat talab ki. Us momin ne kuchh der ghaur karne ke baad kaha ,

"Acha kal zohar ke bad tum usi itr farosh ki dukan par aa jana, main amanat tum tak pahoncha dunga."

Dusre din zohar bad jab sab log itr farosh ki dukan par jama hue to unme wo zaeef ul umr mard e momin bhi tha. Usne itr farosh se kaha,

" Aaj main waaz o nasihat karne ki ijazat chahta hu."

Dukandar ne uski baat ko qubool kar liya aur us mard e momin ne apni guftagu ka aaghaz kuchh yun kiya,

Logo! main falan ibn falan hu. Main haqooq al naas ke mamle me sakht khaufzada rehta hu. Mere dil me duniya ki mohabbat nahi hai aur main qana'at karne wala aadmi hu. Mujhe duniya ke jhamelo se koi dilchaspi nahi hai. Lekin ye saari achi sifate dar'asl ek haulnak waqiye ki wajah se mujh me paida hui hain. Jo waqiya mere saath pesh aya mai chahta hu wo aaj logo ko bhi suna du taaki aap sab azab e Ilahi aur aatish e jahannam se dare. Main roz e qayamat ki sakhtiyo ke baaz ahwal ka aapke samne tazkira karna chahta hu ghaur se suniye,

Ek martaba mujhe qarz lene ki zarurat padi. Maine ek yahudi se 10 qiraan is shart ke saath liye ki aadha aadha qiraan 20 din me lauta dunga. 10 din tak to main use aadha aadha qiraan deta raha lekin uske baad wo mujhe nahi mila. Maine uske bare me puchha to ye pata chala ki wo baghdad chhod kar ja chuka hai.

Kuchh dino ke bad ek raat maine khwaab dekha ki qayamat barpa ho chuki hai. Aur goya mujhe aur dusre logo ko hisab o kitab ke liye jama kiya gaya hai. Maine Allah ke fazl o karam se is manzil ko kamyabi ke sath tayy kar liya hai aur jannat me jane wale logo ke sath shamil ho kar jannat me ja raha tha. Jab mai pul e sirat se guzarne laga to wahan maine aatish e jahannam ke aasar dekhe! Aur uske sath hi maine us yahudi ko bhi dekha jisse maine qarz liya tha. Wo aag ke shole ke manind jahannam se nikla aur mera rasta rok liya aur kehne laha,

.

" mujhe mere 5 qiraan lauta do uske badd aage chale jana."

Ye sun kar meri aankho me aansu aa gaye aur maine kaha,

"Maine qarz wapas dene ke liye tumhe talash kiya lekin tum mujhe mil nahi sake."

Usne kaha,

" Main apna qarz liye baghair tumhe yahan se aage nahi jane dunga."

Maine kaha,

" yahan to mere paas kuchh bhi nahi hai."

Meri is baat par wo kehne laga,

" To fir tum mujhe apni ek ungli tumhare badan par rakhne do."

Maine uski ye baat maan li. Usne apni ek ungli mere ssene par rakh di. uski garmi aur jalan se mee muh se zordar cheekh nikli aur main nind se bedaar ho gaya. Maine dekha ki jiz jagah usne ungli rakhi thi wahan zakhm hai! Mere seene ka wo hissa aaj bhi zakhmi hai. Ilaaj karane ke bawajood ye acha nahi hua.

Itna kehne ke baad nasihat karne waale itr farosh ko khas taur se nasihat karte hue us mard e momin ne apna seena khol kar wo zakhm logo ko dikhaya. Ye manzar dekh kar logo ki aahe baland ho gayi aur wo zaro qataar rone lage.

Itr farsh bhi azab e Ilahi se sakht khaufzada hua. fir wo hindustani shahzade ko apne ghar le gaya aur uski amanat wapas lauta di aur sath hi shahzade se maafi bhi talab ki.

Books for refrences:-

Darussalam vol1

Bikhre Moti 2